Tarix: 18 noyabr 2025
Məkan: Bakı, Azərbaycan

18 noyabr 2025-ci il tarixində Azərbaycan Bacarıqlar Akseleratoru təşəbbüsü Dünya İqtisadi Forumunun Qlobal Akselerator Şəbəkəsi çərçivəsində rəsmi olaraq fəaliyyətə başlayacaq. Azərbaycan Respublikası İqtisadiyyat Nazirliyi və Dünya İqtisadi Forumu tərəfindən birgə yaradılan bu milli təşəbbüs, innovasiya, inklüzivlik və əməkdaşlıq vasitəsilə ölkənin gələcəyin əmək bazarına hazırlığını gücləndirməyi hədəfləyir.

Bacarıqlar Akseleratoru təşəbbüsü aşağıdakı şəxslərin həmsədrliyi ilə fəaliyyət göstərəcək:

• Cənab Mikayıl Cabbarov, İqtisadiyyat naziri

• Cənab Emin Əmrullayev, Elm və Təhsil naziri

• Cənab Rövşən Nəcəf, SOCAR prezidenti

• Cənab Cəlal Qasımov, PASHA Holding-in baş icraçı direktoru

Bacarıqlar Akseleratoru təşəbbüsünün əsas məqsədləri bunlardır:

• Ömürboyu öyrənməni və bacarıqların təkmilləşdirilməsini təşviq etmək;

• Proaktiv şəkildə yenidən yerləşdirmə və məşğulluğu dəstəkləmək;

• İnnovativ bacarıqların maliyyələşdirilməsi modellərini təşviq etmək;

• Cari və gələcək bacarıq ehtiyacları üçün məlumat əsaslı sistemlər qurmaq.

Bu təşəbbüs İqtisadiyyat Nazirliyinin nəzdində fəaliyyət göstərən Dördüncü Sənaye İnqilabının Təhlili və Koordinasiyası Mərkəzi (4SIM) tərəfindən əlaqələndirilir və işçi qüvvəsinin rəqabət qabiliyyətini artırmaq üçün dövlət və özəl sektor əməkdaşlığının mərkəzi platforması kimi çıxış edəcək.

Açılış tədbirində Bacarıqlar Akseleratoru təşəbbüsünün ölkə üzrə rəhbərliyini, sənaye nümayəndələrini, hökumət təmsilçilərini, inkişaf tərəfdaşlarını və təhsil müəssisələrini bir araya gətirərək Azərbaycanın bacarıq ekosistemi üçün ortaq vizyonun formalaşdırılmasına töhfə verəcək. Gündəliyə Dünya İqtisadi Forumunun Təhsil və Bacarıqlar komandası tərəfindən təqdim ediləcək “Gələcəyin əmək bazarı 2025” hesabatından əsas nəticələr və milli bacarıq prioritetləri üzrə strateji müzakirə daxildir.